11:00etan Arrasateko Arbolapetan zen hitzordua. Han, hainbat herritar elkartu ziren eta autoak hartuta Besaidera abiatu ziren. Gehienak, ordea, oinez joan ziren.
Omenaldi hunkigarria
12:00ak inguruan hasi zen omenaldia. Besaideko monumentuaren ondoan batu zen jendea. Karmeloren senideei aurreskua dantzatu zieten lehenengo. Segidan, Xabier Zubizarreta alkate ohiak egin zuen berba. Zubizarretak Karmelo ezker abertzaleko militante ohiari buruz hitz batzuk esan zituen eta Euskal Herriaren aldeko borrokan egindako lan handia goraipatu zuen. Baita haren laguntzeko prestutasuna ere. Ondoren, bertso batzuk kantatu zituzten guztiek batera eta baita Lepoan hartu ta segi aurrera doinuarekin lagunari eskainitako abestia ere.
Segidan, errautsak bota zituzten Besaideko zelaietan senide eta lagunek eta amaitzeko, Eusko gudariak abestu zuten.
Horrela, merezitako omenaldia egin zioten Karmelo Zubillaga apirilean zendu zen arrasatear maitatuari, Araba, Gipuzkoa eta Bizkaia batzen dituen monumentuan.