AUKEA kirol erakundeak dagoeneko erabaki du joan den urtean nortzuk izan ziren Arrasateko kirolari onenak. Kirolari onenaren saria Isa Casado atletari emango diote. Talde onenari saria Mondra Futbol Taldeak jasoko du, eta aipamen berezia Arantzazu Zubia Arrasateko gimnasia taldeko entrenatzailearendako izango da.
Isa Casadok urte borobila izan du, nahiz eta orain min hartuta dagoen. Eski denboraldia hasi aurretik mendiko maratoiak korritzen ibili zen. Besteak beste, Aizkorriko eta Mulhaceneko probetan izan zen, aurreko postuetan beti. Neguan, berriz, mendiko botak alde batera utzi eta zeharkako eskia egiteari ekin zion. Euskadiko Kopa osatzen duten probetan hartu du esku, eta proba horietan lortutako puntuei esker bigarrena izan da Euskadiko Kopan.
Talde onenari saria, berriz, Mondra Futbol Taldeak jasoko du. Azkeneko urteak erregional mailan ibili eta gero, Josu Zubiak zuzentzen duen taldeak preferente mailara igotzeko txartela eskuratu zuen joan den denboraldian.
Aipamen berezia
Aurtengo aipamen berezia Arantzazu Zubiarendako izango da, Arrasateko Gimnasia Erritmikoko entrenatzailearendako. Arantzazu 8 urterekin hasi zen gimnasia erritmikoa egiten, eta 19 urterekin hasi zen Arrasateko taldea entrenatzen. Lan horretan hasi zenetik 19 urte pasa dira, eta oraindik ere lan horretan dihardu. Eta, egindako lana da AUKEAk saritu gura izan duena.