Gu Haziak Gara elkartekoen ekimena da Errekabarren kaleko murala. Herrian egin duten bigarren lana da eta Basotxokoengana jo dute oraingoan elkarlanean jarduteko: "Iaz Ilargi plazan egindakoarekin oso gustura geratu ginen. Giro ona izan genuen eta herritarren gustuko izan zen. Horregatik animatu gara bigarrena egitera", jakinarazi du Paloma Martinez kideak. Orduan, baina, batez ere umeekin jardun zuten lanean, eta nagusi batzuk margotzeko gogoz geratu ziren. Horregatik erabaki dute erretiratuekin egitea orain: "Batetik, gogo handia dutelako, bestetik, denbora, eta gainera, herriari esateko asko dutelako", dio Martinezek.
Eskuak eta begirada
Basotxora jo eta gaia erabakitzeko galdeketa egin zuten erretiratuen artean. Hainbat kontu atera ziren batzarretan eta guztien artean bi hautatu zituzten: "Afektua eta harremanak. Eta horiek zelan irudikatu pentsatu genuen ondoren". Marrazteko orduan hainbat artistek hartu dute parte Izaro Sanchez aretxabaletarrak eta Joana Mantzisidor grafitigile arrasatearrak besteak beste; hormako zirriborroa hain zuzen Sanchezek egin du. "Lehen irudian bi esku irudikatu ditugu, bata nagusi batena eta bestea umearena; bigarrenean, amama baten eta ume baten arteko maitasun keinua; hirugarrenean bi nagusiren arteko begirada; eta azkenekoan, aitaita bat eta iloba bat jolasean".
Ilargi plazan, iaz, marraztutako irudi batzuk oraingoan ere errepikatuko dituzte: "Txoriak eta zirkuluak berriro margotuko ditugu, lotura mantentze aldera", jakinarazi du Sanchez marrazkilariak.
Belaunaldi arteko elkarlana
Basotxoko hainbat kide dabiltza parte hartzen, pozik, gainera. "Ekimen benetan interesgarria izan da. Batetik, herritarren aurrean margotzen dihardugulako, eta bestetik, taldea osatu dugulako aurretik ezagutzen ez ginenon artean. Belaunaldi askotakoak elkartu gara giro ezin hobean, eta ilusio handiarekin gabiltza lanean. Ea halako gehiago egiten diren", dio Imanol Aranzabalek.
Basotxokoak pozik daude eta Gu Haziak elkartekoak ere bai: "Oraindik ez badugu bukatu ere, oso pozik gaude; herriko leku estrategikoan dago eta jende asko gerturatzen dabil interesa agertuz", adierazi du Martinezek. Margolana uztailarekin batera bukatzea zuten pentsatuta, baina martxa onean doa eta aurretik izango dute gertu.
