Aretxabaletarrak dantzatzera animatuko ditu Jaiki elkarteak aurten ere. Zortzi egunetan izango dira ekitaldiak baina egun handia maiatzaren 20a da.
Goiz partean ikastaroak izango dira; hip-hop eta Kontakids kiroldegian; dantza sortzailea mojetan; eta swinga kuartelean. Eta ondoren ikuskizunak: dantza afrikarrak (13:30, Durana kalean); Jam-Ñam (14:30, plazan); eta tximeleta oihal akrobaziak, flamenkoa, swinga eta hip-hopa (18:30, Durana kalea).
Hilaren 21ean, ostera, klake ikastaroa egingo dute goizean (10:00, kuartelean) eta ondoren erakustaldia (13:30, Duranan).
Ikastaroetan jarduteko aurrez izena eman beharra dago; hona bideak: swing eta klake saioetarako: 688 86 21 87; eta gainerakoendako: 688 81 96 65. Argibide gehiago gura dituenak Jaiki elkartera idatz dezake –jaikielkartea@yahoo.es–.
Erretiratuak eta sahararrak
Hilaren 22an, astelehena, jarraipena izango dute ekitaldiek: Kontakids ekimenaren ate irekiak eta emakume sahararren dantzak. Martitzenean saloiko dantzen erakustaldia egingo dute erretiratuek eta umeendako jolasak landuko dituzte kuartelean; Habrá que ponerse cachas ikuskizuna ere egongo da Durana kalean, baita flamenko fusioa ezagutzeko aukera ere.
Eguaztenean euskal dantzak erakutsiko dituzte erretiratuek; eguenean, oihal akrobaziak izango dira eta Flash Dance tertulia; egubakoitzean, Jaiki elkartekoen ikuskizuna eta Rueda Cubana eta domekan, Haur Dantzarien Egunarekin bukatuko dute astea.
Hemen egitaraua osorik.
