Honela azaldu digu Ramon Ajuria alkateak hilaren 19ko bilera: "Bisitaren egunean adierazi ziguten euren eskuetan dagoena egingo zutela herritarrek kalte-ordainak jasotzeko aukera izan dezaten. Diputazioaren aholkularitza aramaioarren zerbitzura jarriko dutela esan didate eta kalte-ordainak nola bideratu, zer egin eta zer ez, azalduko digute. Horretarako izango da bilera; garrantzitsua da guretako, badirudi emandako hitza beteko dutela".
Borondate berbera
Udala aspalditik ari da A-2620 errepidearen itxierak utzitako ondorioekin lanean. Lehentasunezko gaia da eta horregatik lortutako Diputazioaren jarrerarekin pozik dago alkatea. Arabako Ahaldun Nagusi Javier de Andresek berak argi utzi zuen bi erakundeen borondatea dela kaltetuei laguntzea eta Adifi kalte horiek erreklamatzea. Era berean, eskaeren kasuistika "zabala" izan daitekeela onartu zuen De Andresek baina nabarmendu zuen herritar orok duela erreklamaziorako eskubidea.
Diputazioa, interesatu
Arabako Diputazioa interesatu moduan aurkeztu da prozesu judizialean auzia gertutik jarraitzeko. Izan ere, uste dute "arrazoi objektiboak" daudela "kasu askotan" herritarrek arrazoi dutela ondorioztatzeko.
Aramaioko Udalak oraindik ez daki zehazki Diputazioaren laguntza noraino helduko den; zalantza horiek guztiak abenduaren 19ko bileraren ostean argituko dira.