Produktuen eskaintza azken hilabeteetako berbera da, ez da-eta ekoizle berririk sartu. Hori bai, bertako zein Euskal Herriko produktuen zerrenda luzea da oso –30 produktu–; Aramaioko 17 produktu –mermelada, arrautzak, barazkiak, txorizoa eta sagardoa, esaterako– eta Euskal Herriko 13 –arroza, laranjak, olioa eta ardoa, adibidez– kontsumitzeko aukera dago gaur egun.
47 familia dagoeneko
Kultur etxea ia bete egingo da gaur bazkide guztiak agertzen badira. Izan ere, egun 47 familiek osatzen dute Aramailur. Badira batzuk, duela hiru hilabete eskas 30 bat zirela kontuan hartzen badugu. Baina ateak zabalik daude oraindik. Orobengoak adierazi duenez, bazkidetza kanpaina ez da amaitu: "Bazkide berriei zabalik gaude; hori bai, ordurako onartuta egongo diren estatutuak errespetatu beharko dituzte".