Organikoaren kasuan aurreikuspenen gainetik birziklatzen dela adierazi digu Azkargortak: "Hilean 14.000 kilo batzea zen aurreikuspena eta irailean, adibidez, 17.320 batu ziren". Gainontzeko hondakinen kasuan aurreikuspenak baino gutxiago da jasotzen dena. Errefusarena da datu deigarriena: hilean 8.400 kilo batzea aurreikusten zen eta 1.520 jaso ziren irailean. Azkargortaren arabera, aurreikuspenak Hernani eta Usurbilgo datuekin egindakoak izan dira eta hiri handiagoak izanik, baliteke datu horiek ez egokitzea Antzuolara.
Atez atekoa enpresetan
Atez ateko bilketaren ezarpenean bi fase zehaztu ziren. Lehenengoa herriguneari eta etxebizitzei bideratutakoa, eta bigarrenean sartuko lirateke enpresak. Datorren astean, eguaztenean, hasiko dira enpresak atez ateko sistemarekin hondakinak ateratzen. Azkargortak nabarmendu digu hiri hondakinak jasoko direla enpresetan, "bestelako hondakinak, toxikoak edo arriskutsuak enpresa bakoitzak kudeatu beharko ditu, orain arte moduan eta dagokion lekura eraman".
Enpresen artean ezberdindu dituzte enpresa txikiak eta handiak. Enpresa handiek funtzionatuko dute edukiontzi irekiekin. Arazoren bat balego itxi egingo lituzkete edukiontzi horiek eta giltza edukiko lukete enpresako arduradunek eta biltzaileak. Enpresa txikiek, berriz, etxebizitzen moduan funtzionatuko dute, beraien zintzilikarioarekin eta kuboarekin.
Hondakinak nahastuta
Arazoei dagokienez, batez ere hasieran egon ziren, herritarrek ez zutenean oraindik oso garbi nola sailkatu hondakinak. Dena dela, Markel Azkargortak esan digunez poliki-poliki joan dira arazo horiek konpontzen: "Hasieran batzuek organikoa ateratzen zuten plastikozko poltsan eta horrekin ere egon zen arazoa, baina azken hilabeteetan normalizatu da; jendeak ondo egiten du orain sailkapena".