Uztaileko azken egunean, 31n, San Inazio egunean, ospatu ohi da urtero Urbiako jaia, eta aurten ere egingo da, baina aldaketak egongo dira eta aurreko urteetan baino ekitaldi gutxiago antolatuko dituzte.
Meza eta erromeria
Gipuzkoako eta Arabako Partzuergoak jakinarazi duen moduan, Urbiara igotzeko erabiltzen den Arabako Zumarraundi izenez ezagutzen den bidea ixteko erabakia hartu du Zalduondoko Udalak, errepidearen egoera txarra argudiatuz, eta, ondorioz, aurten ezingo da ibilgailuz igo. Gauzak horrela, aurten ez da ez herri kirolik ezta artzain txakur txapelketarik egingo. Meza eta Fondak antolatzen duen erromeria bakarrik egingo dira. Bazkalaurrean eta ostean egingo den erromerian, Miren, Agur eta Maider trikitilariak izango dira. Meza 11:30ean hasiko da.
Jaieguna izanik, Oñatitik Arantzazurako autobus zerbitzua egongo da egun horretan. Urbiako jaia dela kontuan izanda, gainera, indartuta egongo da zerbitzu hori.