Laboral Kutxak jakitera eman du 2021-22 denboraldirako ziklisten zerrenda. Zazpi txirrindularik errepikatu egiten dute; hona hemen horiek: Usoa Ostolaza, Irantzu Beloki, Tania Calvo, Elena Cuenca, Idoia Eraso, eta Xubane Garai eta Garazi Estevez aretxabaletarrak.
Beste seiak, berriak dira: Olatz Gabilondo bergararra, Mireia Arriazu, Yurani Blanco, Ariana Gilabert, Sandra Gutiérrez eta Amaia Lartitegi.
Aldiz, lauk erabaki dute ziklismoa lagatzea: Uxue Albizuak, Nekane Gomezek, Eukene Larrartek eta Ainhize Barrainkua aretxabaletarrak.
Iazko ilusioarekin
Euskadi Fundazioaren babesarekin, Laboral Kutxako ziklistak mundu mailako txirrindulari onenekin lehiatuko dira. "Laboral Kutxa taldeak euskal emakumeen tropelaren erreferentzia izateko aldeko apustuari eusten dio, eta nazioarte mailako lasterketa garrantzitsuenetan egongo gara", dio taldeko zuzendari Jon Lazkanok. "Ilusio eta motibazio berberarekin, ziklista horiekin, lanean jarraitzearen aldeko apustua egiten dugu, progresioa dutela eta izango dutela uste dugulako", gaineratu du.