Oñatin bizi den familia bat, euren jaioterrira oporretan joan eta bertan gertatu da erasoa, Dominikar Errepublikan. Villa Isabela Digital hedabideak argitaratu duenez, gizonezkoak bikotekideari labankada ugari eman dizkio, eta horren ondorioz emakumea egoera larrian dago ospitalean. Gizonezkoak erruduntzat aitortu du bere burua poliziaren aurrean.
Eraso honen aurrean, Oñatiko Udalak eta Sare feministak adierazpenak egin nahi izan dituzte, erasoa gaitzesteko: "Gaitzespen gogorrena azaldu nahi dugu aurreko astean izandako eraso matxistaren gainean, eta gure laguntza nahiz begikotasun osoa adierazi nahi diogu erasoa pairatu duen emakumeari, eta bere ingurukoei. Udalak dituen informazio eta baliabide guztiak jarri ditu erasotako emakumearen eta honen familiakoen esku, baita prozesuan behar izan dezakeen laguntza guztiaren gaineko informazioa ere".
Beste erasoa, Arrasaten
Arrasateko Mugimendu Feministak jakinarazi duenez, Arrasaten eraso sexista bat gertatu da azken egunetan: "Joan den eguenean jaso genuen erasoaren berri. Jipoi larria izan zen, eta emakumea ospitalera eraman behar izan zuten". Emakumeen Mundu Martxaren Arrasateko Plataformak eta Pottogorriek deituta, "eraso larri" hori salatzeko elkarretaratzea egin zuten martitzen arratsaldean, Arrasateko plazan. Bide batez, hitzordua baliatu zuten orain artean gertatutako eraso guztiak salatzeko; Euskal Herrian aurten lau emakume hil baititu indarkeria matxistak.
