Arrasaten, Bergaran eta Elgetan bazkari bana egin zuten domekan, eta astelehenean beste bazkari bat egin zuten Arrasaten. Orotara, 35 lagun inguru batu dira, eta, parte-hartzeak zertxobait behera egin duen arren, pozik azaldu da Nora Ugarteburu SOS Arrazakeriako kidea. "Gure ondoan bizi den hori ezagutzeko aukera eskaintzen dute bazkari hauek, eta, horrez gain, estereotipoak eta aurreiritziak gainditzeko ere balio dute", dio. Normalean, anfitrioia izaten da kozinatzen duena, eta jatorri askotariko janak prestatu dituzte aurten. Nikaraguako eta Hondurasko janaria dastatu dute, esaterako, eta baita euskal babarrunak ere.
Gipuzkoako datuak
Bizilagunak egitasmoa Euskal Herri mailakoa da eta Gipuzkoan, SOS Arrazakeriak koordinatzen ditu. Probintzian 131 bazkari egin dira, 1000 parte-hartzaile baino gehiagorekin.