Gertu dago dena. Ordu gutxi barru hasiko dute asteburuan Oñatin izango diren bi lasterketetan lehena, Buetraitzeko igoera bertikala –22:00etan, Errekaurkulluko zubian, Arantzazuko aparkaleku azpian–. Korrikalariak banan-banan irtengo dira, eta 2,6 kilometrotan ia 800 metroko desnibel positiboa gainditu beharko dute, Buetraitzeraino (1.305 metro) igota. Gainera, igoera hori gauez egin beharko dute, erreferentzia garbirik barik –igoera ondo markatuta izango dute, noski–.
Aloñako Igoerak, 15 urte
Domekan, berriz, 330 korrikalari abiatuko dira lasterketako 22,6 kilometroak egiteko gertu –09:00etan, Oñatiko plazan; 1.868 metroko desnibel positiboa–. Korrikalari kopuru horretatik 71 oñatiarrak dira –zortzi emakume–. Eta debagoiendarrak 163 izango dira. Oihane Azkorbebeitia, Nerea Amilia, Saioa Arkonada, Walter Becerra, Iñigo Olaberria eta Iban Letamendi izango dira faborito nagusiak. Eta omenaldiendako tartea ere izango da aurtengoan.