Gradu Bukaerako Lana aurkeztu duzue Kimu Berrira.
Bai, Eusko Jaurlaritzarentzat egindako lana da, eta ondare ez materiala aztertzen du, zehazki, aurreskua. Hori lantzeko bi azterketa egin ditugu, euskal kultura ondare ez material bezala, nahiko kontzeptu abstraktua eta berria dena. Horregatik, jendeak uler dezan, gaia Euskal Herrira ekartzea eta gertuko bilakatzea erabaki genuen, eta aurreskua aukeratu genuen horretarako.
Zergatik aukeratu zenuten aurreskua?
Euskal Herri osoa bilduko zuen gai bat nahi genuen, eta aurreskua aproposena zen. Gainera, dokumentazio lana egiten, jakin genuen Unescok tangoa Gizon-emakume guztien ondare sailkatu zuela; eta aurreskuarekin tangoarekin egin den antzeko zerbait egitea motibagarria iruditu zitzaigun.
Dantza gertukoa duzue?
Ez bereziki. Egia da Maider dantzaria dela eta euskal dantzen talde batetan urte asko daramatzala. Hala ere, guztiontzat da gustuko gaia eta motibatzen gaituena, horregatik aukeratu genuen. Hain zuzen ere, gaia aukeratzerakoan ez dugu gugan pentsatu, euskal gizartearen interesekoa izan daitekeen begiratu dugu, publikoaren gustukoa.
Zein izan da proiektuaren helburua?
Eusko Jaurlaritzak zuen beharrizanetako bati erantzutea zen helburua. Beraiek argi zuten dokumental bat nahi zutela, eta gu gure lana ahalik eta ondoen egiten saiatu gara; eta lana erabiliko duelakoan gaude.
Kimu Berri saria jasotzea espero zenuten?
Inola ere ez. Aurten ikasleok aurkeztu ditugun lanek maila oso altua izan dute, eta pozik gaude saria irabazi izanagatik. Aurtengo promozioa oso interesgarria izan da, badaude argitaratzeko moduko lanak.