LAB: "MCCk beste edozein multinazionalek bezala ez duela jokatzen agerian uzteko garaia da"

LABek Fagor Etxetresnen egoerari buruzko oharra kaleratu du, Enplegua Erregulatzeko Espedientearen negoziaketa epea bukatzeko bi egunen faltan. Akordio baterako aukera zabalik dagoela uste du sindikatuak, baina pilota korporazioaren teilatuan dagoela. LABek, bere aldetik, proiektu industriala, lanpostu kopurua eta horien lan baldintzak bermatzearen alde egingo duela berretsi du. Albiste barruan, prentsa oharra, osorik.

"Fagor Etxetresnak taldeko 326 langileak kaleratzeko aurkeztu zen Enplegua Erregulatzeko Espedientearen negoziaketa epea larunbat honetan, hilak 14, amaitzen da.

Negoziaketa honetan, LABek proiektu industrialaren bermea, mantendu beharreko lanpostu kopurua eta sortuko liratekeen lanpostuetako lan baldintzak jarri ditu mahai gainean.

Zentzu horretan, Fagorreko likidazio planean LABek aurkeztutako alegazioa epaileak partzialki onartu izana ongi baloratzen dugu, zeinak saritzen duen subrogaziorik ez balego, lanpostuen  bermerako neurriak  jartzen dituen balizko eroslea. 

Momentu honetan akordio baterako aukera zabalik dagoela uste dugu, enplegua bermatzeko aukera badagoela uste dugu, baina pilota FAGOR markaren jabe den MCCren teilatuan dagoela uste dugu. MCCk erantzukizuna du Fagorren egoeran, eta erantzunkizun hori bere egin behar du, daukan ardura asumituz. FAGOR marka Taldeko beste enpresa baten izenean dutenez, eta likidazioan Fagorreko industria jarduerarekin aurrera egiteko markaren erabilpena eskatuko dutenez erosleek, langile guztien eskubideak defendatzeko eskatzen diogu MCCri.

Balizko akordio batek sendotasuna eta lasaitasuna emango lieke atera daitezkeen proiektuei. Zentzu horretan, uste dugu guztion inplikazioa beharrezkoa dela; Fagor Etxetresnak enpresan ez ezik Grumal eta Basauriko lantokian egon litezkeen aukerak ez ditugu alferrik pasatzen utzi behar, eskualdeetako ekonomia sarean galdu ezin den aberastasuna dagoelako enpresa horietan.

Arantza Tapia Ekonomia Garapen eta Lehiakortasun Sailburua balizko erosleekin bildu izana ondo ikusten dugu, edozein deslokalizazio saiakera ekiditeko bada, eta proiektu industrialak Euskal Herrian errotzeko bada. Hala ere, ez dugu ulertzen Tapiak langileen enpleguaz publikoki hitz egitea, eta era berean, Fagorreko langileekin ez bildu izana.

Egiten genuen irakurketa zuzena dela uste dugu, MCCk beste edozein multinazionalek bezala ez duela jokatzen agerian uzteko garaia da. Aurrera begiratzeko garaia da, egindako hutsetatik ikasi eta eredu kooperatibista elkartasun eta partaidetza baloreetara bueltatzeko unea da".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.