Bergaratik, Arrasatetik, Antzuolatik, Oñatitik, Aretxabaletatik, Eskoriatzatik, Donostiatik, Hernanitik, Zarautzetik... Gipuzkoako udalerri ugaritatik bertaratu dira gimnasta gaztea gaur Bergarara. Batetik, Eskolarteko B mailako Txapelketaren bigarren fasean lehiatu dira goizeko saioan; izan ere, otsailean izan zen kanporaketaren lehenengo saioa Arrasaten.
Ariznoa elkarteko Lore Alberdik aditzera eman duenez, "taldeetatik lehenengo bostak igaro dira txapelketaren finalera", eta bakarka aritu direnetatik, ostera, lehenengo zortziak.
Goizeko lehiaren ostean, arratsaldean erakustaldiaren txanda izan da. Bertan, gimnasta gazteenek txapelketa mundua apur bat hobeto ezagutzeko aukera izan dute. "Oso polita izan da arratsaldeko saioa, 30 talde zeuden guztira. Nik uste dut gurean behintzat, gimnasia erritmikoaren etorkizuna ziurtatuta dagoela".
Ikusle ugari
Bai goizean eta baita arratsaldean ere, harmailak bete-bete egon dira gimnasten erakustaldia jarraitzeko eta talde edo bakarlari bakoitzaren lanaren amaieran, txalo zaparradak nagusitu dira, gustura egon diren seinale.
