50 langile pasa abiatu dira Basauritik kamiseta urdinak soinean dituztela; Galdakao zeharkatzen dabiltza une honetan (09:10) eta Zornotzarako bidea hartuko dute ondoren, bertan otordua egiteko. Handik aurrera segituko dute, Apatamonasterioraino, bertan pasa behar dute-eta gaua.
Arrasatera, berriz, bihar iritsiko dira, Elorriotik zehar etorrita, 11:00etan. Hemengo Bazkideak Plataformako lankideek egingo diote harrera Martxa Urdinari Kanpantzarren, eta 11:20an Meatzerreka auzorako bidea hartuko dute guztiek, bertako elkarte gastronomikoan "merezitako hamaiketako beroa (salda, txistorra…)" eman behar diete-eta.
Ostean, bihar Edesatik abiatuko diren hiru autobusekin bat egin, eta 12:00ak aldera, Martxa Urdinak Mondragon Taldearen egoitzara joko du, haren aurrean protesta egiteko.
Baldintza berberak
Joseba Lopetegik, Edesako langileen ordezkariak esandakoaren arabera, bi dira euren aldarrikapen nagusiak:
- Edesako langileek Fagor Etxetresnetako langileen baldintza berberak izatea
- Bideragarriak diren Fagorreko plantak zabaltzea: "Basauri eta Bergarako Confort lerroak; Eskoriatzako minia eta Garagartzako egosketa lerroa", azaldu du Lopetegik.
Horrez gainera, gainontzeko baldintzetan ere Fagorrekoek duten tratu bera aldarrikatzen dute: langabezia saria %80ra arte osatzea eta, adibidez, aurre-erretiratzeko aukera eta baldintza berberak: "Edesako erretiratuek egoera txarragoa bizi dute; adibidez, kotizazio handia galtzen dute: urtero %7. Horrez gainera, hasiera baten, behintzat, ezin dira erretiratu 65 urteak bete arte", zehaztu du.