Jesus Mari Zabarte 1984an atxilotu zuen Guardia Zibilak Hernanin. Hortaz, 29 urte daramatza preso. 3/4ak beteta ditu eta 2013ko martxoan ateratzekoa bazen ere, Parot doktrina ezarrita 2014ko martxora arte luzatu zioten espetxealdia.
Auzitegi Nazionalako Fiskaltzak Zabarte aske uzteko eskaera egin du. Beraz, orain bere kasua aztertzen duen Zigor Salaren aretoak hartu beharko du erabakia. Izan ere, joan den astean Zigor Salako epaileek hartutako erabakiaren harira, presoak aske uztearen erabakia ez du Auzitegi Nazionaleko hamazazpi epaileren osoko bilkurak hartuko. Fiskala presoak aske uztearen alde agertzen denean presoari zigorra eman zion salak emango du agindua.
Guztira ETAko bederatzi preso aske uzteko eskatu du Auzitegi Nazionaleko Fiskaltzak. Horietako hiru askatzeko agindua eman dute zegokieten Zigor Salen aretoek eta beste seiren kasua erabakitzeko dago.
Beste bi debagoiendar
Azaroaren 8an gelditu zen aske Luis Mari Azkargorta 'Kanto' aramaiorra, Estrasburgotik datorren ebazpenari kasu eginda. Beste bi preso debagoiendarrek ere badute Parot doktrina ezarrita: Jose Gabriel Urizar Gautxorik (Arrasate, 1985ean atxilotua) eta Xabin Usandizagak (Oñati, 1997an atxilotua).