Kutxa Fundazioaren Gizarte-ekintzaren babesa eduki du urteetan zehar sariketak, baina, 2012a ezkero ez dute babesle horren laguntzarik jasotzen eta bide berriak ari dira topatzen finantzazioa bilatzeko, horien artean, Nobel-truk ekimena.
Hala, bekaren ordainketari egin gura diete aurre modu horretan euskara elkartekoek. Deialdia ez dute ez Arrasatera, ezta Debagoienera mugatu gura, Euskal Herri osora hedatu nahi dute. Hala, interesa duten guztiek 50 euro sartu ditzakete AEDk horretarako bideratu dituen bi kontu korronteetariko batetan.
(Aurreko bekekin itzuli eta kaleratutako liburuetariko batzuk)
Abenduaren 20a izango da diru ekarpenak egiteko azken eguna. Eta ondoren, dirua ipintzen duten guztiek, Jokin Zaitegi bekaren bitartez itzuli den azken liburua jasoko dute trukean: Mo Yan idazlearen Hori umorea, maisu!, hain zuzen ere. Debagoiendarrek Arrasateko, Aretxabaletako zein Bergarako euskara elkarteetan jaso ahal izango dituzte liburuak.
Ibarretik kanpoko ekarpena egiten dutenek, ostera, postaz jasoko dute Maialen Marinek eta Aiora Jakak itzulitako lana.
Jokin Zaitegi beka, kolokan
Bestalde, AEDtik gogora ekarri dute, honezkero 27. Jokin Zaitegi beka deituta egon beharko litzatekeela. Baina bekaren beraren jarraipena ikusteke dagoenez, atzeratu egin dute.
Izan ere, babeslerik eduki ezean elkarteak berak ezin izango dio bere kasa aurre egin bekaren deialdi berri bati. "Guretzako oso garrantzitsua da beka hau, izan ere, beste modu batetan euskaraz irakurriko ez genituzkeen liburuak kaleratzeko balio baitu. Horregatik, ate ezberdinak jotzen jarraituko dugu, babesle berri bat aurkitu arte".
Mao Yan idazlearen lana, kalean
Egubakoitz honetan aurkeztuko dute, bestalde, Jokin Zaitegi bekaren bitartez itzuli den azken liburua. 'Hori umorea, maisu!' lana Donostiako Elkar dendan aurkeztuko dutela eman dute aditzera.