Berri-agentzietatik esan dute Jose Manuel Soriak, Espainiako Industria, Energia eta Turismo ministroa, adierazi duela Etxetresnak hartzekodunen konkurtsoan sartuko direla, Mondragon Korporazioko presidente Txema Gisasolak atzo jakinarazi zionez.
Diotenez, Soria ministroak esan du "gertutik" jarraitu duela Fagor Etxetresnen krisia azken hilabeteetan, "Txema Gisasolak unean unean egindako likidazio injekzioen berri eman" diolako; baina ez dela "aski" izan arazoa konpontzeko eta, horregatik hain justu, sartu zirela hartzekodunen aurre-konkurtsoan.
Fagor Brandt sartu da
Fagor Etxetresnekin ere jarri da harremanetan Goiena eta adierazi digute aste honetan edo hurrengoan sartuko direla hartzekodunen konkurtsoan, oraindik finantzaketa bilatzeko lanean jarraitzen duten arren, "oso, oso, oso zaila" ikusten dutelako.
Frantzian bai, han badela nobedaderik azaldu digute, hango filiala gaur arratsaldeko lehen orduan sartu delako hartzekodunen konkurtsoan; goizean komunikatu diete berria hango sindikatuei. Nanterreko auzitegian egin dute eskaera.
Gaur arratsaldeko bileraren gainean galdetuta, ez dute itxaropenik finantziazioari dagokionean: "Ez dugu uste finantzazio arazoarentzako konponbiderik etorriko denik handik. Bilera hori gehiago da enpresaren krisiak ahalik eta kalte gutxien eragin dezan soluzioak bilatzeko".