Madonnarekin mundu mailako bira egin ostean, hirukotea berezkoak dituen kontzertu txikietara bueltatu da. Argia eta apainketa neurtu baten laguntzarekin, Kalakanen musikak protagonismo handiagoa lortzen du.
Hirukoteak ez daki geldirik egoten, eta, nolabaiteko arriskua hartuz, ustekabeari eta naturaltasunari lekua uzten dio. Abesti berrietan taldearen aztarna eta ibilbidea erraz igartzen da. Musika moldaketek Nafarroako Erriberatik Zuberoako bailaretara, Rio de Janeiro, New York, Londres, Erroma eta Amsterdamera eroango dituzte entzuleak.
90 minutuan, Thierryk, Jamixelek eta Xanek euren ahotsen eta perkusioaren laguntza besterik ez dute izango. Hirurek XVI. mendeko kantuak gaurkotasunez jantzi dituzte; horrez gain, egungo hainbat olerki ere kantatzen dituzte. Kontzertua sorpresaz josita egongo da, eta zaila da hirukote horren musika genero batean kokatzea. Gaztelekura joaten direnek haur kanta baten doinu leunetatik ahots eta perkusio doinu harroagoetara egingo dute salto.
Kalakanek euskal musika munduratu egin du, ireki, zabaldu. Iparraldeko hirukote horren gonbidapena onartzen dutenek belarri eta begiak zabaltzeaz gain, bihotza ere ireki beharko dute.