Markagailura gol bakarra igo bazen ere, Aitor Arrate entrenatzaileak urteko "partidu hoberena" izan zela adierazi zuen. Arrate oso pozik azaldu zen bere jokalariek eginiko lan eta jarrerarekin. Partidu borobila eta aukeraz betetakoa izan zen, gerturatutako guztientzako liluragarria.
Lehenengo zatiko 28 minutuan sartu zuen gola Enekok. Eta nahiz eta gehiago sartzerik ez lortu, lehehengo zatiko azkenengo minutuetan eta baita bigarreneko hasierakoetan, aukera garbi asko izan zituen Bergarak. Atezainaren aurrean bakar bakarrik behin baino gehiagotan egon eta ezin izan zuten gol gehiago sartzerik izan. Markagailuan kopuru txikia ikusi arren "partidu oso berezia jolastu dugu. Oso konpletoa izan da" adierazi zuen Arratek. Bigarren zatiko minutu askotan, partiduaren "jaun eta jabeak izan gara, ondo jolastu dugu bai defentsan eta baita erasoan ere, pena bakarra gol gehiago sartu ez izana da" adierazi zuen pozik.
Partiduko gol bakarra lehenengo zatian eta Enekok sartu bazuen ere, zapatuko partiduan protagonismoa ez zuen jokalari bakar batek izan, "talde osoa izan da protagonista, orokorrean jokalari guztiek partidu oso ona egin dute, ezin dut bat nabarmendu guztiek eman baitute dena" esan zuen entrenatzaileak.
Golik jaso gabe, lehen aldiz
Aitor Arrate Bergarako entrenatzailea defentsiboki eginiko lanaz harro zegoen, baita atea hutsean lagatzeaz ere, izan ere, "lehen aldia da ez dugula gol bat jasotzen eta aste guztian, entrenamendutan, horretaz mentalizatzen ibili ondoren, gaurkoan lortu dugu atea zeroan ustea, oso garrantzitsua da hori" adierazi zuen harro.