Azkenengo minutuko gol baten erruz, Antzuolak ezin izan du etxean irabazi

Nahi eta ezin. Antzuola saiatu da, behin eta berriz, baina ez du garaipena lortzerik izan. Azkenengo minutuan Beriok, gol bikaina sartu dio gainera. Hasiera hasieratik partidu nahiko orekatua izan da. Lehen zatian bi taldeetako jokalariek presioa sartu eta aukera bat baino gehiago izan dute. Beriok oso partidu ordenatua jokatu du eta Antzuolak aldiz, joku oso bizia erakutsi du.

Lehenengo gola, Berioko Pablok lortu du estrategiazko jokaldi baten ondoren. Jon Iturbe atezain antzuolarrak ezin izan du ezer egin gelditzeko. Baina etxekoek ez dute amore eman eta lehen zatia amaitzeko 10 minutu eskas falta zirenean, Aranak, jokaldi polit baten ondoren gola sartu eta partidua berdintzea lortu du. Ondoren beste aukera batzuk ere izan dituzte etxekoek. Josu Zubikarai eta Julen Arana behin eta berriz saiatu dira, baina ez dute zorterik izan. 

Bigarren zatian ere indartsu

Bigarren zatian ere, gogotsu eta indartsu atera dira etxekoak, presio asko sartu eta aukera politak izan dituzte, baina 15 minutuan Iñaki Agirrek, arrisku gutxiko jokaldi batean akats bat izan eta bere atean sartu du gola. Baina elastiko gorridun mutilek ez dute amore eman eta dena eman dute bigarrena sartu eta berdinketa lortzeko. Minutu gutxi batzuk besterik ez dute behar izan euren helburua lortzeko, izan ere, 19.minutuan gutxi gora behera, Longaresek buruz gola sartu du.

Berdinketarekin nahikoa ez eta hirugarrena lortzeko aukera asko izan dituzte etxekoek. Baita Berioko jokalariek ere. Bazirudien bi eta bikoarekin amaituko zela partidua, baina azkenengo minutuan, Erik Jimenez Berioko jokalariak, gol ikusgarri eta bikaina sartu du.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.