Zinemaldiaren aurtengo edizioa gaur goizean aurkeztu dute Maria Cristina hotelean. Hala, aurtengo ediziorako prestatutako programazioa eta epaimahaikideak ezagutarazi dituzte bertan egin den ekitaldian Jose Luis Rebordinos Zinemaldiaren zuzendariak, eta Maialen Beloki eta Joxe Fernandez Zuzendaritza Batzordeko kideek.
Zinemira saila eta Irizar saria
Eukal Herrian ekoitziriko zinemari buruzko saila da Zinemira eta Donostiako Zinemaldiak zortzi lan aurkeztuko ditu aurten sail honetan: bost estreinaldi eta aurten ekoitziriko hiru lan. Hain zuzen, Mireia Gabilondo bergarraren 'Amaren eskuak' filma aurkeztuko da atal honetan.
Estreinatuko diren horietako lau Euskal Zinemaren Irizar Saria eskuratzeko lehiatuko dira, baita Zinemaldiaren beste edozein sailetan aurkezten diren eta gutxienez %20 euskal ekoizpena duen gainerako lanak ere, betiere mundu mailako estreinaldiak badira. Saridunak 20.000 euro gordin irabaziko ditu, filmaren ekoizleentzat. Bada, epaimahaia Anari Alberdi abeslariak, Itziar Nogeras kultur kudeatzaileak eta Asier Altuna zuzendari bergararrak osatuko dute.