Oporrak amaitu dira eta jendeak etxerako bidea hartu behar izan du. Debagoiendarrez gain, europar askok ere AP-1 errepidea erabiltzen dute etxera bueltatzeko. Familiak, bikoteak, lagunak... Jende askok erabiltzen du Arrasaten dagoen autobideko zerbitzugunea. Kasu askotan mila kilometro egin ostean, Arrasateko hau izaten da lehen geltokia.
Frantziara bidean
Zerbitzugunean geratzen diren gehienen helmuga Frantzia izaten da. "Maroko edo Portugaldik datoz gehienak" dio Markel Goikolea zerbitzuguneko langileak. Oporrak sorterrian edo familiarekin pasa ostean orain etxerako bidea nekezagoa dela onartzen dute, "Huelvako hondartzan egon ostean lanera joan bueltatzea kosta egingo zait" dio Parisera doan Lindak.
Frantziako zerbitzuguneek fama handia izan ohi dute baina frantsesek ez dute aldaketa nabarmenik ikusten "zerbitzu gune hau oso ongi dago", "garbi dago eta atseden hartzeko toki aproposa da" diote erabiltzaileek.
Gainontzeko zerbitzuguneek eskaintzen dituzten zerbitzuez gain, gureak zerbitzu estra bat dauka. Bidaiari gehienek Udalaitz mendiagatik dezente galdetzen dute "garaiera esatean harritu egiten dira, garaiagoa dela uste izaten dute", dio Goikoleak. Tamaina alde batera utzita, Udalaitzen ikuspegia berezia dela onartu beharra dago.