ANEFS elkartea ez da maila nazionalera mugatzen, munduko bazter askotan dituzte-eta areto futboleko delegaritzak. Hala, egunotan bazter guztietako zorion agurrak jaso ditu Narciso Pavok: "Japonetik ere zoriondu naute, han ere lagun entrenatzaileak ditudalako lanean, eta ilusio handia egin didate bereziki".
Eskoriatzako entrenatzaileak hamarkada bat darama Espainiako areto futboleko elkarte nazionalean esku hartzen, eta urtero-urtero Bartzelonan elkartzen dira entrenatzaileen formaziorako. Hala, areto futbolari eskainitako dedikazioagatik sarituko dute Pavo: "Lagun mordoa egin dut urte hauetan guztietan, eta niretako hori da sari handiena. Hala, areto futboleko elkartea ez da Espainiara mugatzen, Argentinan, Brasilen, Japonian... Nazioarte mailan delegaritza mordoa dituzte, eta horrek ere balioa ematen dio sariari". Gaineratu du, areto futbolari eskaintzen dion denbora dela benetako saria.