Partidu hori ez dute buruz burukoan elkarren kontra jokatuko, eta bai bikoteka. Hala, afizionatu mailako partiduan Arrasatekoak Jakarekin osatuko du bikotea, eta Bergarakoak Arrieta izango du ondoan. Norgehiagoka horrekin batera eskuz binakako beste lehia bat izango da, hain zuzen, Gipuzkoako Ohorezko Mailako txapelketan finalean izan ziren bi klubetako ordezkariak izango dira, ostera, aurrez aurre. Amezketako Zazpi Iturriko eta Tolosako Aurrera Saiaz klubeko pilotariak, alegia. Partidu horretan Urbietak eta Telletxeak Olaetxearen eta Rezustaren kontra jokatuko dute.
Herri kirolak, Zaldibarren
Goizean, Santamasetako jai egitarauaren barruan Herri Kirolak izango dira Zaldibarren. 12:00etan hasita Iñaki Perurena harri-jasotzaileak erakustaldia egingo du. Aizkoran Nafarroako eta Gipuzkoako aizkolariak aurrez aurre izango dira: kolpeka, abiadura proban, bertikalean oinbikoa eta lan luzeko probak izango dituzte. Trontzan, berriz, emakumezkoak eta gizonezkoak izango dira aurrez aurre, eta motozerrakin erakustaldia ere egingo dute.