Eusko Legebiltzarrerako hauteskundeak egingo dira domekan. 21 hautesleku egongo dira Debagoienean eta hauteskunde-mahaiak, berriz, 78 izango dira. Hauteskunde gauaren zuzeneko saio berezia ikusteko aukera egongo da, gainera, Goiena telebistan eta goiena.eus atarian.

EH Bilduk kanpaina ekitaldia egin zuen atzo Bergarako Irala kalean, domekako hauteskundeetara begira baikor daudela eta aldaketa etorri badatorrela azpimarratuz. Eusko Legebiltzarrerako hautagai Arkaitz Rodriguezek hartu zuen hitza, eta aldaketarako unea "orain" dela aldarrikatu zuen.