2010eko maiatzean hasi zuten kanpaina Oñatin, eta udako oporren ondoren, irailean hasi ziren berriro ere. Hasieran %70eko parte-hartzea izan zuten, baina azken hilabetetan jaitsi egin da kopuru hori. Osasun zentroan uste dute bi izan daitezkela arrazoiak: alde batetik, proba entregatzeko epea bukatuta dagoela pentsatzea; eta, beste alde batetik, potean jarri beharreko pegatinak galduta izatea. Bietan, arazoa konpon daiteke osasun zentroan bertan, edo 900 84 00 70 doako telefonora deituta.
Bestalde, dei berezia egiten diete 2010ean 50 eta 69 urte artean bete zutenei. Proba egiteko gutuna jaso ez badute, aurretik aipatu dugun telefonora dei dezakete, edo familiako medikuari edo erizainari galdetu.
Proba erraza
Egin beharreko proba oso erraza da. Beharrezko kita anbulatorioan jaso ahalko da. Kaka lagin bat eraman beharko da hiru egunen buruan, laborategian analizatu dezaten. Proba egiten dutenek bi asteren buruan jasoko dute emaitza etxean, gutun bidez.