Txirrinka taldeak herri barruan bidegorria jartzeko eskaera egin zuen. Orain, Udalarekin eta Aldundiarekin batera ari dira herri barruan bizikletaz ibiltzeko errepide sare bat antolatzen.
Dagoeneko proiektuaren ildoak idatzi dituzte. Asmoaren alde onak, txarrak, abantailak, zabalkundea, oztopoak eta bestelako puntuak idatzi dituzte. Bizikletaren erabileraren aldeko kanpainak ere egingo dituztela esan dute. Aldundiko teknikari batekin egin dute lana eta datozen hilabeteetan Zorione Galdos oñatiarrak proiektu hau bideratzen egingo du lana.
Herri barruan bizikletaz
Asmoa da herri barruan egiten diren desplazamenduak bizikletaz egitea. Etxetik lanera, eskolara edo posta etxera, adibidez, bizikletaz joatea eta ez autoan. Dagoeneko bizikletaz ibiltzeko errepide sare honek lotu beharko lituzkeen guneak markatu dituzte mapa batean: ikastetxeak, auzoak, erdigunea eta lantegiak, besteak beste.
Irailean berriro ekingo diote bilerak egiteari proiektua aurrera ateratzeko.