2019a ezkero Arrasateko Txorbela otxoteko zuzendari den Xabier Barriola agurtzeko solasaldi musikatua antolatu zuten apirilaren 11n San Frantzisko elizan. Txorbelakoek Irati Erostarbe biolontxelo-jole arrasatearra gonbidatu zuten emanaldia borobiltzeko; eliza bete zuten ikusleek txalo zaparradekin eskertu zuten saioa.

Debagoieneko Dantzari Egunak 170 dantzari inguru batu zituen Arrasaten, zapatuan. Antzuolako Oinarin, Aretxabaletako Leizarra, Oñatiko Oñatz, Arrasateko Txikitxu Arrostaitz eta Lore Gazteak –antolatzaileak–, eta aurten lehenengoz, Eskoriatzako Gorosarri elkartu ziren. Eguraldia lagun, sekulako giroa sortu zuten kaleetan zein plazaren bueltan.