Maiatzean jokatuko da Algaraka bakarrizketa lehiaketa. Babesle eta laguntzaile askorekin baina Bergarako Jardun Euskara Elkartea eta Goiena Komunikazio Taldea dira antolatzaileak. Hala, lau saiotik bi Debagoienean jokatuko dira; lehenengo kanporaketa eta finala. Bakarrizketariek izena emateko aukera dute orain, egubakoitzera arte. Algaraka.eus atarian  egin daiteke. Jarduneko Maitane Arizabaleta eta Goienako Oihane Agirre izan dira Hemen Debagoiena saioan.

Libe Garcia de Cortazar (Neubat, Sorkun, Izaki Gardenak, Pasadena...) bueltan da bere kantu propioak azalerazteko sortutako Libe proiektuarekin. Giro iluna eta abesti barnerakoiak batu dituen Azal ezten izeneko lan berria aurkezten izan zen Arrasateko gaztetxean Kooltur Ekintzak gonbidatuta. Alboan izan zituen ohiko bidelagunak: Dani Arrizabalaga, Aitor Garcia de Vicuña eta Jon Basaguren, besteak beste.