Erabilera eta esanahirik ez duten espazio hutsei egiten zaie erreferentzia, asfaltoz bete, eta zakarrontziekin apaintzen diren horiei. Irudipena daukat, azken urteotan izandako urbanizazio lanetan, etxe eta etxe artean sortzen diren espazio apur horiei, ez zaiela behar bezalako garrantzirik ematen.
Horren harira, berri pozgarria jaso dugu bergararrok, Arrizuriagako parkea zabalduko dutela jakitean. Gaur arte, ikusi bai baina ukitu ezin izan den artelan abandonatua izan da, baina aurrerantzean, herritarrok ere espazio honetaz gozatzeko aukera izango dugu. Herriko beste koadro batzuekin konparatuta gainera, koloretsua eta erabilgarriagoa da.
Hala ere, onar dezagun leku berriak sortzea ez dela nahikoa izaten sarritan, herritarrok garela leku bakoitzari bere esanahia ematen diogunak. Izan ere, leku berean biraka ehunka kilometro egiten dituzten erretiratuak eta lurrean pilatzen diren pipa azalik gabe, parke bat sekula ez da parkea izango. Horregatik, geu ere bagara leku diren lekuak ez izatearen errudunak.
Dena den, ziur nago erretiratu osasuntsu eta ume pipa zaleek eskertuko duten proiektua dela Arrizuriagakoa.