Futbol galaktikoari ematen zaion lilurak askotan itsutu egiten gaitu eta beste era bateko ereduak bistaratzeko zailtasunak ditugu. Dena zaku berean sartu eta analisirik egin gabe iritzi ematera ohituta gaude. Bai edo ez, ez dago beste ezertarako lekurik.
AKEk futbola aitzakia hartuta herrian bertan talde kirola egin eta disfrutatzeko modua eskaintzen du. Auzolanean eginiko eredu propioko proiektua da. Galaktikotik ez du ezer, oso lurtarra da!
AKEren hasiera, gehienetan gertatzen den moduan, posible zela amestu zuten zoro batzuen buruan egon zen. Ofizialtasuna, geroago, 1993-94 denboraldian, Bigarren Erregional Mailan, kamiseta gorriarekin lehiatzen hasi zen taldeak eman zion.
Urteak pasa dira, eta, aldaketa dezente egon badira ere, hor jarraitzen dute jokalariek, gurasoek, bazkideek, batzordekideek, babesleek, laguntzaileek, meza ondorengo boleto erosleek, futboleroek, kontrakoek, AKEren kudeaketarekin kritikoek... Guzti-guztion artean AKE sustraitu eta proiektu sendo eta jasangarri bihurtu dugu.
Bi gurasok denboraldi hasieran futbol eskola sortu, eta, euren burua futbolaren kontrakoa izanik, seme-alabei jarraitu beharrean aurkitu eta kexaka ziren. Guraso hauek, larunbatean, AKE festan ikusi besterik ez zegoen! Gorriz jantzita eta AKEren eredua defendatzen zera entzun nien: "Hau ez dok futbola! Hau la ostia dok!". Izan ere, Erregional Mailako jokalariek zeramaten kamisetetan irakurri zitekeen moduan, AKE futbol taldea baino askoz gehiago da!
Beraz, futbola bai edo ez, hori galdetzea merezi al du?
Segi dezagun herri proiektua den AKE garatzen eta handitzen. Lan egiteko eredua indartuz helburuen lorpena eta mugarriak gainditzea ekarriko du. Hastapeneko futbol-ero haiek izan zituzten ametsak berritu eta gauzatzeko!
Besarkada goxo bana AKE sortu eta egunero jaten eman diozuen guztioi, ondoren etorriko zaretenoi, Pablitori eta bidelagun dudan Nekaneri.
----------
Mikel Kerexeta Kortabarria
Antzuola Kirol Elkarteko presidentea
Antzuola