Pozik zegoen, erosleek autoa gero eta urte gutxiagoan aldatzen zutela ikusita. Hurrengo urteetako joera, gainera, hori izango omen zen. Auto batekin hamar urte egin, eta jendeak autoa aldatuko du? galdera egin nion. Keba, neska! Bost bat urte egin, eta jendeak auto berria erosiko du.
Pasa dira urteak, eta ni neu, behintzat, auto-saltzaileentzat ez naiz pagotxa izan. Hogei urtean bi auto. Azkena, gainera, bigarren eskukoa, eta ematen du luze geratuko dela nirekin.
Ingurura begiratuta ere, ez zait erraza estatistika hori betetzen duen jende asko topatzea. Pentsatzen hasita, auto distiratsuak, berri usaina daraien horietakoak, aspaldi ez ditut errepidean ikusi. Autoak ez dira niretzat arreta gune izan, baina auto berriena galzorian dagoen espeziea ematen du.
Joan den hilabetea izan omen zen urteetako txarrena auto-kontzesionarioetan. Ez da alerik saltzen, eta ez da poztekoa. Baina auto salmentarena ere, ez ote doa logika batera?