Ikastola honen helburuetako bat Kilometroak jai jasangarria ospatzea denez, igandean Bergarara bizikletaz etortzera animatzen zaituztegu.
Kutsadurarik ez du sortzen; garbia da; osasungarria; dibertigarria; bidegorri eta aparkalekuak erabilgarri izango dira; egokia eta erosoa da; talde, lagunekin nahiz familian joateko aproposa; ordutegi aldetik ez dauka mugarik eta nork bere kasa antolatu ahal du joan-etorria; ez dauka kosturik; autobusen edo bestelako ibilgailu edo garraiobideen kopurua murriztea dakar…
Onurak asko dira, hortaz, eta, gainera, bizikleta martxak antolatu dira Oñati, Arrasate, Antzuola eta Soraluzetik. Bi martxa egongo dira: bat, 09:00etan; eta bestea, 10:30ean (Antzuola, 10:00). Martxez gain, norbera nahi duenean ere etor daiteke.
Martxetarako, topaguneak egongo dira: Arrasaten, Eroskiko aparkalekuan; Oñatin, Etxe Aundin; Antzuolan, herriko plazan; eta Soraluzen, bidegorriaren hasieran.
Aparkalekuetan zaindariak egongo dira, 20:00ak arte, sartzen laguntzeko, aparkatzeko, bizikletak zaindu eta ateratzen laguntzeko ere. Bi aparkaleku izango dira: bat, Labegaraietan; eta bestea, Agorrosingo kirol eremuan.
Ea, bada, animatu!
----------
Itxaso Fernandez
(Aranzadi Ikastolako DBHOko 2. mailako ikasleen izenean)
Bergara