Erraztasun eta onura galantak ematen ditu Internetek, baina horrekin batera, badira webgune batzuk gaztetxoendako aproposak ez direnak. Hala, Aitor Madrid KZguneko arduradunak esan digu asteleheneko ikastaroa Interneten dauden edukiak neurtzeko baliagarria izango dela.
Hasteko, Interneteko Erabiltzaileen Espainiako Elkarteak gurasoei ematen dizkieten zenbait gomendio azalduko dituzte ikastaroan. Horrekin batera, nabigatzaileak aukera ematen du Interneten zein webgune bisitatu ditugun jakiteko, bisitatutako webguneen artxibo historikoa gordetzen duelako. Eta ikastaroan erakutsiko dute hori nola erabili.
Bistan da polizia lanetan ibili gura duenak izango duela horretarako aukera, baina aproposagoa da eduki-aholkulariak ematen duen zerbitzua. Aholkulari horrek Interneteko webguneetako eduki-motak kontrolatuko ditu. Astelehenean, 11:00etatik 12:00etara izango da ikastaroa.