Zaborra bai, tonerrak ez
"Adibidez, etxeko olioa apartatzea, etxean zaborra banatzea…hortik hasten da. Toner eta halakoak, akaso, ez dakigu zela berrerabiltzen diren, eta komeni da informazio gehiago izatea eta jarraipena egitea; halakoetarako oso erabilgarriak dira hemengoa moduko azokak", kontatu digu bisitari batek.
"Auto elektrikoak deitu dit arreta, adibidez, edo tonerrak birizklatzeko postuak. Izan ere, guztiok dugu inprimagailua etxean, eta zer egiten dugu tonerra gastatzen denean? Ba errazena: zaborretara bota, eta kontuz ibili behar da halakoekin", kontatu digu beste batek.
Etxeko edukiontziak handiegiak
"Azokak ematen du ikusteko aukera, eta jakiteko zela diren gauza berriak. Ikusi dugu, adibidez, zela egiten den konposta, baina hori badakigu lehenagotik, ze mentalizatuta gaude dagoeneko. Olioak batzeko poteena ere ondo dago etxerako, tamaina onekoak direlako; baina zaborra batzeko etxean ipini beharreko edukiontziak handiegiak dira, "monumentuak" dira, eta hori izaten da txarrena", gaineratu du hirugarrenak.
Teknologiarik berrienak
Izan ere, denetarik izan da asteburuan Eskoriatzako azokan: bizikleta elektrikoak, tolesgarriak, seg-wayak, led teknologiadun argiak, irradiatze-zoruak, eguzki plakak, argiarekin "dantzan" jartzen den "eltxoa", lurpetik berotasuna hartzen duen sistema, 12 orduan beroa ematen duten tximiniak… guztiak ere, aurrezpena bultzatzen duten teknologia berriak.
Zaborraren buruhaustea
"Ikusteko eta ikasteko azoka da hau. Azken batean gauza asko ez dakigu ezta merkatuan daudenik ere", adierazi du Eneritz Zubiak, Eskoriatzako Ingurumen teknikariak eta azokako antolatzaileetako batek.
Baina bereziki hondakinei eman diete garrantzia Jasangarritasun Azokan: "Batez ere Antzuolan martxoan hasi behar direlako atez ate zaborra batzeko sistema erabiltzen. Eta ondo funtzionatzen badu, bailara osora zabaltzeko asmoa dagoelako. Azken batean, nahikoa buruhauste ematen dizkigute zaborrek. Horrenbeste sortzen dugu bada irtenbideren bat eman egin behar zaiola. Zabor larregi sortzen dugu eta birziklatu edo beste zerbait egin behar da derrigorrez. Horri eman diogu garrantzia azokan", gaineratu du Eskoriatzako Udaleko teknikariak.