Urte mordoa daramatza Tomas Rubio Roy eskoriatzarrak margotzen. Margolan ugari egin ditu hasi zenetik eta martxoaren 4an erakusketa ireki zuen Arrasateko Harresi aretoan. Olio pinturak egitea atsegin du eta paisaia margotzen du normalean. Roy bezala sinatzen ditu bere lanak.
Erakusketa honetan hogeita bederatzi lan jarri ditu ikusgai, "bi urteko lana", eskoriatzarraren esanetan.
Eskoriatzako Arana kalean estudio bat du eta bertan aritzen da margolanak egiten. "Hala ere, ahal dudanean kanpora joatea gustatzen zait", eman du aditzera Royk.
Paisaiak nagusi
"Atsegin dut urtegi inguruak margotzea", azaldu du artista eskoriatzarrak. Hala, Urkulu eta Landa ikus daitezke bere lanetan. Baina orohar ura atsegin duela begibistakoa da; izan ere, itsasoa ere sarri ageri da bere lanetan.
"Baina atsegin dut herrietako txokoak eta mendiak margotzea ere", eman du aditzera Royk. Paisaia margotzeaz gain, pintzelak hartu eta pintura hilak ere irudikatzen ditu.