Ikasle Abertzaleak-ek gonbidatuta etorri dira EHUko arkitekturako ikasleak HUHEZIra euskal irakaskuntzaz hitz egitera, taldearen ustetan hizkuntzarena baita Euskal Herriko ikastetxe eta fakultateetan urratzen diren bederatzi eskubideetako bat.
2001ean arkitektura eskolako euskal adarreko ikasleei agindu bai baina eskaini ez zizkieten irakasleak lortzeko egindako borroka izan du hitzaldiak ardatz.
Borroka dinamika eredugarria
HUHEZIko Ikasle Abertzaleak taldeko kide Liher Gonzalezen ustez, borroka hura eredugarria izan zen, ordura arte egin ez bezalako ekimenak eraman baitzituzten aurrera, erdal adarreko ikasleekin harremanak mantenduz. Zentzu horretan, HUHEZIn bertan ere badagoela zer egin gaineratu du. Izan ere, enpresekin lotutako ikasgaiak erdaraz irakasten dizkiete, baina etorkizunean lan munduan euskaraz jardun nahi badute, garrantzitsua da oinarriak euskaraz jasotzea.
Hitzaldian arkitekturako ikasleen historia entzutearekin batera, borrokaldiko irudiak ikusteko aukera izan da, baina Hodei Zenikaonandia hizlariak garbi utzi nahi izan du ez datozela eredu hori aplika dezaten esatera, imajinazioa erabiliz molde berriak asmatu eta emaitza onak lortu ditzaketela esatera baizik.
Hizkuntzaren ondotik, kultura
Gaurko hitzaldiarekin amaitutzat eman dute HUHEZIn hizkuntz eskubidea aldarrikatzeko prestaturiko egitaraua. Euskal kulturaren alde egitea izango da hurrengo urratsa.