Lehenbizi Morau igo zen agertokira. Hamar bat urte igaro dira azken aldiz Elgetan jo zuenetik eta emanaldi lasaia, dotorea eskaini zuen kantautore hernaniarrak. Ni naiz guai moduko kantuak entzuteko aukera gutxi izaten dira eta Balerdi Balerdiren kamisetarekin atera zen Morauk hiru bis egin behar izan zituen zaleen eskaerari erantzuteko.
Jarraian, Balerdi Balerdi iruindarrekin festa etorri zen. Morauk berak kantu bat eskaini zuen nafarrekin, Nork daki ezaguna, jendeak Coca-Cola lata bat moduan ezagutzen duena. Amaiera aldera, Bide Ertzeaneko Imanol Ubeda eta Balerdi Balerdiko teklista izandako Blanca Izcueren laguntzarekin, Letrak zeruan kantua eskaini zuten, oso txalotua eta momentu eder horietako bat. Tartean aspaldiko kantu ezagunak eta azken garaikoak (dozena erdi bat berriak) eskaini zituzten, zaleen gozamenerako. Musikariak zein zaleak gustura geratu ziren Elgetan bizi izandakoarekin. Iragana indarrez eta bizi-bizi etorri zen atzo Espaloira.