Egun berezia izan da gaur Elgetako herri eskolako neska-mutikoendako. Binaka lerroan jarri eta Herriko plazara egin dute 15:00etan. Bertan zain zeuden Maala guraso elkarteko kideak. 17 kilo gaztaina zituzten prest umeen, irakasleen eta gurasoen artean banatzeko. Hainbeste kilo gaztaina erretzeko ardura aurten ere Jose Monterrosorena izan da.
Lehenengo kantuan
Borobilean ipini dira eta kantuan egin dute lehenengo eskolako neska-mutikoek. Nagusienek txirula jo dute eta amaitutakoan egunkariko orri bana hartu, kukurutxoa egin eta gaztaina beroak jasotzeko lerroan ipini dira. Txikienek lehenengo eta nagusienek gero dozena erdi bana gaztaina jaso dituzte. Nahikoa lan izan dute haiek zuritzen, baina gustura jan dituzte gehienek.