Oraindik ez dute eman Torrealdean babes ofizialeko etxeak eraikitzeko data zehatzik, baina urte amaieran hastea espero dute. Ordutik gutxi gorabehera urte eta erdiko epea izango dute lanak amaitzeko.
Herritarrek, ordea, etxe hauen gaineko informazioa jaso nahi dute, eta horretarako izena eman dute udaletxean. Orain dela hiru urte zabaldu zuten zerrendan izena emateko epea eta ordutik 100 lagun inguruk azaldu du babes ofizialeko etxeei buruzko interesa. Baina, baliteke tarte horretan aldaketak izatea.
Bilera azaroan
Informazioa emateko eta babes ofizialeko etxeen zozketan parte hartzeko bete behar diren baldintzak azaltzeko bilera egingo dute herritarrekin azaroan Espaloian. Eguna oraindik zehazteke dago, baina zerrendan izena eman dutenei gutun bidez jakinaraziko diete eta guk ere emango dugu egunaren berri jakin bezain pronto.
Bertan, eskaera orri bat banatuko diete interesatuei zein agiri aurkeztu beharko lituzketen azalduz. Horrela jakingo dute zenbat lagun izango diren etxebizitzen zozketan. Zozketan sartzeko ipini dituzten baldintzetako batzuk hauek dira: gutxieneko soldata bat jasotzea eta diru kopuru batetik gorakoa ez izatea; eta etxebizitza baten jabe ez izatea.