Orain artean, Gabonetan, beti ipini izan dituzte argiak herrian eta aurten ere hala egingo dute jaiak gerturatu ahala, herria girotzeko asmoz. Argiak ipini ala ez jarri izan da eztabaidarik Udalean, baina azkenean jartzeko erabakia hartu dute. Aralar alderdiko zinegotziek beraien ezadostasuna azaldu zuten gai honen inguruan, argiak ipintzea gastu energetiko handia izateaz gain, kontsumismoaren irudi ere badela argudiatuz, eta Gaboneak beste modu batera girotu daitezkeela esanez.
Argiak plazan, arboletan eta kataian
Hala ere, Udalak Plazako zuhaitzetan bonbillak ipiniko ditu, herriko sarrerako arkuaren alde banatan Zorionak idatzita argiekin eta udaletxeko balkoietan, berriz, piztu eta itzaltzen diren koloretako argiak. Abenduaren 19rako argi guztiak jarrita egongo dira eta Gabon jaiak amaitutakoan kenduko dituzte guztiak.
Olentzero lehiaketa
Bestalde, Gabonei beste ukitu bat eman nahian Olentzeroren irudiak egin eta onena zein den aukeratzea proposatu zuen Aralar alderdiak azken Kultura Batzordean, eta honela ipini dute Olentzero lehiaketa abian.
Edozein herritarrek, ume, gazte zein helduek, har dezakete parte. Irudiak abenduaren 20an, zapatua, arratsaldez, Plazara eraman beharko dituzte parte hartzaileek eta ondoren, sei lagunek osatutako epaimahaiak erabakiko du zein den egokiena edo saria merezi duena.
Sari banaketa abenduaren 23an
Olentzero kalez kale ateratzen da Elgetan egun horretan, herriko umeen eskutitzak jasotzen eta egun hori aprobetxatuko dute antolatzaileek. Ondoren, Gabonak pasatu artean aurkeztutako irudiak herriko hainbat txokotan jarriko dira ikusgai. Oraindik zehazteke badago ere, baliteke herriko elkarteetako balkoietan ipintzea irudiok. Parte hartu nahi dutenek, beraz, 22 egun dituzte ahalik eta irudirik egokienak prestatzeko.