Sailkapeneko aurrealdeko postuetan dagoen taldea da Erroibide Irun, eta hala ere etxekoek gertu izan zuten garaipena (82-86). Puntuek, baina, ihes egin zuten Zubikoatik, eta txarrena da datorren asteko kontrario Goierri Verkol ere aurrealdean dagoela. Bada, Padura eta Paules Skoda taldeak atzean utzita oñatiarrek (18 puntu) liga amaierara arte borrokan jarraitu beharko dute Hotel Gran Bilbao Berrio Otxoarekin (18 puntu) Salleko Renaultekin (18 puntu) eta Cosecha 1986 taldeekin (19 puntu). Eta posible bada, sailkapenean erdian dauden beste pare bat talde ere borroka horretara sartu arazi.
MUk garaipena etxetik kanpora, Tolosan
EBA mailan, berriz, Mondragon Unibertsitateak garaipen garrantzitsua eskuratu zuen atzo Tolosaren kantxan (66-68). Garaipen horrekin Larreategiren mutilek sei partidu irabazi dituzte ligan, eta mailari eusteko borrokan oraindik bide luzea geratzen bazaie ere, pauso garrantzitsua eman dute aurrera. Gainera, azken bi partiduak galduta, garaipenak mesede egingo die. Datorren astean etxean jokatuko dute, sailkapenean azken postuan dagoen Venta de Bañosen kontra.