Ligako azken derbia futbol jai bilakatu zuten atzo Mondrako eta Arizmendiko ordezkariek. Egia da puntuei dagokienez ez zegoela askorik jokoan, dena erabakita zegoelako, baina berdegunean lehia polita izan zen. Arizmendik nagusitasun handia erakutsi du ligan, baina hala ere, Titu-ren neskek gogotik egin behar izan zuten lan talde zuri-morea menderatzen (2-3).
Aretxabaletakoak aurreratu ziren markagailuan, Mondrak berdintzea lortu zuen, baina atsedenaldian aldageletara erretiratu aurretik Arizmendikoek 1-2koa egin zuten. Hala, bigarren zatian Arizmendik 1-3koa egin eta bazirudien partidua erabakita geratuko zela, Mondrak aldea txikitu zuen arte (2-3). Baina, ordurako indarrak agortuta zeuden, eta Mondrak ez zuen partidua berdintzeko aukera izan.