Eskoriatzako gaztelekuan batu ziren atzo, lehenbizi, abenturan parte hartuko duten guztiak, eta arauak azaldu ondoren; erloju, telefono mugikor eta motxiletan gordeta zeramaten janaria konfiskatu zizkieten antolatzaileek. Batek baino gehiagok ordulariak kentzearen arrazoia zein zen galdetu zuen, baina antolatzaileek ez zuten inongo pistarik eman nahi izan.
Abenturari Herriko Plazan eman zioten hasiera, eta probaz-proba Leixargaraterantz abiatu ziren joko ezberdinak eginez. 36 gaztek hartuko dute parte lau taldetan banatuta; Basurdeak, Orkatzak, Urtxintxak eta Saiak. Bestalde, lau kapitain eta Julian Iantzi imitatuko dituzten aurkezleak ere izango dira gazteen gidari moduan.
Ez da soilik irabaztea
Janari goxoagoa edo lo egiteko leku hobea izateko jokoak irabazi behar izango dituzte gaztetxoek, baina hezitzaileek jarritako arauen arabera. Izan ere, irabazteaz gain; euskara, talde-lana, errespetua, elkarbizitza… bezalakoak kontutan hartuko dituzte, garaipena nori eman aukeratzeko. Hala eta guztiz ere, helburu nagusia ondo pasatzea izango dute.