Hain gailu txikian interfazea da gakoa eta Applek Watch-en ordulari tradizionalaren alboko botoia eta pantaila ukigarriaren aukera guztiak konbinatu ditu. Hala, hasiera botoia eta menuetan nabigatzeko scroll-a da, aldi berean, botoi hori eta pantailari dagokionez, atzamarraren ibilbidea eta presioaren indarra atzeman dezake zafirozko pantailak. Teklaturik ez duenez, ahots bidez ere emango zaizkio aginduak erlojuari.
Osasun digitalizatua
Produktu berri honekin osasun eta kirol aplikazioetara begira jarri da Apple. GPS, pultsometro eta azelerometro-arekin erabiltzailearen egoera fisikoa eta jarduera kuantifika dezake eta horretarako beren beregi sortutako aplikazioekin etorriko da Watch-a.
Noski, erloju adimenduna bai, baina iPhone batekin osagarri beti, eta iPhone 5etik aurrera bakarrik izango da bateragarria gailu berria, Wifi bidezko konexioarekin. Aplikazio zerrenda luzea aurkeztu zuten jada martitzenean eta garatzaileei ere zabaldu diete bidea eta aplikazioak ugarituko dira laster.
Diseinua
Bi esfera neurritan (38 eta 42 mm), hiru akabera mota – urrezko bat eta guzti – eta makina bat uhalekin aterako dute merkatura urte hasieran eta modelorik merkeenak 349 dolar balioko du. 2015ean ikusiko da, beraz, ea oraingoan ere lehenak iritsi ez arren produktu berriarekin merkatuaz jabetzeko gauza badiren.
iPhone 6 handiagoa
Arreta erloju berriak bereganatu bazuen ere, joan den martitzeneko ekitaldia, izatez, iPhonearen belaunaldi berria aurkezteko izan zen. iPhone 6a bi neurritan etorriko da: 4,7 hazbeteko bat eta, Plus delakoa, 5,5 hazbetekoa. Ezaugarri tekniko hobetuak eta, modelo handiaren kasuan pantaila erresoluzio handia dakartza belaunaldi berriak nobedade bezala baina aurkezpenean, nabarmengarrien artean, ordainketak egiteko sistema berri baten aurkezpena izan zen. Izan ere, datozen hilabeteetako borroka nagusietako bat alor horretan izango da, ordainketa sistemetan, eta Applen proposamena ikuskizun zegoen. Bada, Pay izenaren NFC teknologia erabiliko dute ordainketetarako, Touch ID identifikagailuarekin eta Passbook aplikazioarekin batera. Erabiltzaileak bere kreditu txartelaren datuak karga diezazkioke aplikazioari eta teknologia horren bitartez iPhone 6 eta Watch-ekin ordainketak egin.