Ibilbideari dagokionez, ia urtero moduan, aldaketa txikiak izango ditu aurten ere, baina oinarrian, Soraluze eta Bergara banatzen dituzten 10 kilometroak egitea izango da erronka.
Parte-hartzeari dagokionez, antolatzaileek gehienezko muga ezarri dute, ekonomikoki mugak daudelako nahi beste jende hartzeko: "700 lagunendako tokia izango da, modalitate guztiak kontutan hartuta. Jende gehiago hartzeko aurrekontu handiagoa behar da, eta alde horretatik eskerrak eman nahi dizkiogu Servimasa enpresari, ematen digun babesagatik". Hala, bezperara arte eman ahalko da izena –azaroak 2– kirolprobak.com webgunean, baldin eta lehenago 700 plazak betetzen ez badira.
Egun osoa girotuta
Antxintxika krosa eguna girotzeko hitzorduetako bat izango da, baina ez bakarra, arratsaldeko lehenengo orduan eskola kiroleko 150 neska-mutiko ingururendako lasterketak antolatuko dituztelako.
Eta lehenago, eguerdi partean, Esaiteko ordezkariak ahaleginduko dira eguerdia girotzeaz: "Halako egun bat oso aproposa da ofizialtasuna aldarrikatzeko. Hala, eguerdian herri kirolak antolatuko ditugu eta, horretarako, Bergarako kirol taldeekin jarriko gara harremanetan", adierazi zuen Turrillasek. Eta kirol zinegotzi Azkargortak gaineratu zuen herri kiroletan esku hartu nahi duten koadrilek kirol zerbitzuekin harremanetan jartzea baino ez dutela, izenematea bideratzeko.
Nobedadea, mendi lasterketa
Antxintxikakoen asmoa da egun horretan guztiak entretenitzea, baita gaztetxoenak ere: "Horretarako, Antxintxika krosa amaitu eta segituan haurrendako moto txikien lasterketak antolatuko ditugu". Broma giroan, aurre-mundial izendatu dute gaztetxoen moto txikien lasterketa: "Izan ere, haurrekin benetako mundiala Antzuolan egingo dugu, otsailean lehenengoz egingo dugun mendi lasterketa aprobetxatuta". Horra, aurkezpenean emandako azken nobedadea. Otsailean Irimo inguruan mendi lasterketa antolatuko du Antxintxikak.