Baloi bakoitza azkenera arte borrokatu zuten bi taldeek baina apenas izan zen sarrera itsusirik; horren adierazle da Anduaga epaileak lau txartel hori bakarrik atera zituela –hiru Aloñari eta bakarra UDAri–. Beraz, gol aukera gutxi izan ziren. Garbiena Oinatz Agirre aurrelari aretxabaletarrak izan zuen lehen zatiko 30. minutuan: Aitor Perezen pase eder baten ostean bakarrik geratu zen Mikel Aginagalde atezainaren aurrean. Atzetik zuen atzelaria driblatu bai, baina ez zuen baloia sarera bidaltzen asmatu. Horrez gain, ez zen jokaldi aipagarririk izan lehen zati osoan, estrategia jokaldi batzuetan sortutako arrisku apurra salbu.
Polemika bigarren zatian
Bigarren zatirako Albistegik hiru jokalari aldatu zituen. Hobeto irten ziren aretxabaletarrak baina Andoni Azkargortaren mutilek denboraz erreakzionatu zuten. 66. minutuan heldu zen partiduko lehen jokaldi eztabaidagarria: Aloñakoak asko kexatu ziren UDAko atzelari batek baloia eskuarekin jo zuela-eta marrazainak bandera altxatu zuenean. Handik gutxira heldu zen partiduko lehen gola, hori ere polemikaz josia. Marrazainak jokoz kanpokoa adierazi ostean Aloñako atzelariak geldi geratu zirela aprobetxatu zuen Julen Erañak Oxel Apraitzi pasea egin eta atezainaren aurrean bakarrik uzteko. Apraitzek, noski, ez zuen hutsik egin; 0-1 eta Aloñako jokalari zein jarraitzaileak sutan. Epaileak abantailaren legea adierazi zuen, denen harridurarako.
Emozioa amaierara arte
Epailearen erabakiak eragindako haserreagatik akaso, etxeko taldeak are oldarkorrago egin zuen UDAren aterako bidea. Eta saiakerek eman zuten bere fruitua: Aimar Lizarrak maisuki bidali zuen baloia sareetara buruz, ia partidu osoan ikusi zen jokaldi onenean. Baina emozioa ez zen hor amaitu, epaileak amaiera adierazi arte bi taldeak saiatu ziren hiru puntuak eskuratzen. Datorren jardunaldian beste derbi bat izango dugu, UDAk Bergara hartuko du Ibarran.