ADICAEren esanetan, "txarrena gertatuz gero, hiru milioi familia harrapatuta geratuko dira".
Are gehiago: ADICAEren iritziz, "Espainian planteatu den arriskua, erakundeak likidatzekoa, finantza-kontsumitzaileen historian inoizko iruzur handiena izan daiteke".
Europako Batasunetik "datozen albisteekin" kezkatuta agertu dira ADICAEko ordezkariak. Izan ere, azaldu dutenez, errenta finko edo aldakor produktu jakin batzuk dituzten bezeroek "aurrezki guztiak galtzeko" arriskuan egongo dira. Arrisku hori "teorikoa" zen, baina, bete egiten bada, "konfirmatuta" geratuko da produktu horiek modu masiboan merkaturatzea "iruzurra" izan zela.
Horregatik, ekainaren 23an mobilizatzera deitzen ditu ADICAEk kaltetu guztiak eta baita "herritar eta giza-erakunde guztiak" ere. Egun horretan, "erantzunak eta irtenbideak exijitu" nahi dituzte "finantza arazoak" dituzten guztiendako. Izan ere, arazo horiek "finantza-erreskateaz geroztik okertu egin dira", ADICAEren ustez.